Imeachtaí na Scoilbhliana 2012/2013

Próiseas Comhairliúcháin le Gaeilgeoirí óga

Tá Feachtas Óg-Ghluaiseacht na Gaeilge i mbun próisis chomhairliúcháin faoi láthair le daoine óga atá ag freastal ar mheánscoileanna Gaeilge. Ba mhaith linne do thuairimí a fháil ar cad atá ag teastáil ó lucht óg na Gaeilge i dtaobh imeachtaí trí mheán na Gaeilge. Tá do chomhairle ag teastáil!
Má tá suim ag do scoil páirt a ghlacadh sa phróiseas comhairliúcháin seo déan teagmháil le Ursula trí ríomhphost a sheoladh chuig ursula.feachtas@gmail.com

Imeachtaí na scoilbhliana 2012/2013:

An Cúrsa Ceannaireachta

Reachtáileann Feachtas an Cúrsa Ceannaireachta fud fad na tíre chun scileanna ceannaireachta a theagasc do Ghaeilgeoirí óga na hidirbhliana atá ag freastal ar Ghaelscoileanna agus ar scoileanna Gaeltachta. Is iad aidhmeanna an Chúrsa Ceannaireachta ná chun:

•Ceannairí Óga a fhorbairt chun an Ghaeilge a chur chun cinn ina bpobail féin

•Oiliúint ar chur ar dhaltaí maidir leis na sainscileanna a bhaineann le ceannaireacht

San iomlán bíonn sé uair a chlog i gceist leis an gCúrsa Ceannaireachta agus reáchtáiltear é thar ceithre seachtaine. Fáilteofar roimh iarratais ó Ghaelscoileanna agus scoileanna Gaeltachta a bhfuil suim acu sa chúrsa.

 

 

 

 

An Cúrsa Feasachta Teanga

 

Is cúrsa nua é an Cúrsa Feasachta Teanga a d’fhorbair Feachtas chun tuilleadh eolais a thabhairt do dhaoine óga faoi staid na Gaeilge agus conas tabhairt faoi athbheochan teanga. Sa chúrsa seo pléitear Stair na Gaeilge chomh maith leis na céimeanna a bhaineann le hathbheochan mhionteanga. Pléitear chomh maith na cearta teanga atá ag Gaeilgeoirí agus oibrítear ar phlean teanga leis na daoine óga. Tá an cúrsa seo á reáchtáil le linn na scoilbhliana ar fad agus tá sé dírithe ar dhaltaí idirbhliana sa Gaelscoileanna agus i scoileanna Gaeltachta.

 

 

 

 

An Fáinne

 

Gach bliain taistealaíonn foireann Feachtas chuig scoileanna éagsúla fud na tíre chun Agallamh na bhFáinní a reachtáil le linn Sheachtain na Gaeilge. Cuirtear agallamh deich nóiméad ar an dalta chun a líofacht sa Ghaeilge a mheas agus bronntar fáinne Ór nó Airgead orthu ag braith ar an gcaighdeán Gaeilge. Is agallaimh neamhfhoirmeálta iad Agallaimh na bhFáinní a reachtáiltear chun bród a thabhairt do Ghaeilgeoirí óga don iarracht a dhéanann siad chun ardchaighdeán a bhaint amach sa teanga agus chun cleachtadh a thabhairt dóibh ar dhul i mbun cómhrá Gaeilge. Bíonn táille bheag i gceist do gach dalta a ghlacann páirt sna hagallaimh.

Reáchtáiltear an t-imeacht seo le linn Mhí an Mhárta agus fáiltítear roimh iarratais ó Ghaelscoileanna agus scoileanna Béarla.

 

 

 
 
 
An Cúrsa Eachtraíochta

Le linn laethanta saoire na Cásca freastalaíonn baill Feachtas ar Chúrsa Eachtraíochta sa Chairlinn, áit a eagraítear imeachtaí ar thalamh agus ar uisce do Ghaeilgeoirí óga. Is trí mheán na Gaeilge a stiúirítear an cúrsa seo chun béim a chur ar úsáid shóisialta na Gaeilge taobh amuigh den scoil agus chun seachtain spraoiúl a eagrú do lucht óg na Gaeilge. Is cúrsa taitneamhach agus spreagthach é a theagascaíonn ardscileanna spóirt uisce agus talaimh don duine óg. Ní mór do rannpháirtithe an chúrsa seo ardchaighdeán sa Ghaeilge a bheith acu. Is trí Ghaeilge amháin a reáchtáiltear an cúrsa seo. Tá an cúrsa seo páirt-mhaointhe ag Feachtas.
 
 

 

 

Scléip na hÓige
Is cuid d’Oireachtas na Gaeilge é Scléip na hÓige a eagraítear go speisialta do Ghaeilgeoirí óga. Tagann óg-eagraíochtaí Gaeilge chomh maith le Gaeilgeoirí óga aonaracha ó gach cearn den tír chun bualadh le Gaeilgeoirí óga eile agus chun céiliúradh a dhéanamh ar an nGaeilge. Cuirtear clár imeachtaí le chéile don tseachtain ina mbíonn imeachtaí spóirt agus ceoil, dioscó, díospóireacht agus imeachtaí eile go léir eagraithe trí Ghaeilge. Tógann foireann Feachtas dream ó Bhaile Átha Cliath chuig Scléip na hÓige gach bliain agus glacann muid páirt ghníomhach in imeachtaí na Scléipe. I mbliana reáchtáilfear Scléip na hÓige i Leitir Ceanainn, Co. Dhún na nGall ón 30ú Deireadh Fómhair go dtí an 2ú Samhain.
 
 

 

 

An Turas Teanga

Eagraíonn Feachtas an  Turas Teanga i mBéal Feirste agus i mBaile Átha Cliath do dhaltaí Gaelscoile i rith na scoilbhliana. Tugann na daltaí cuairt ar ionaid agus ar institiúidí lán-Ghaeilge atá ar fáil sna príomhchathracha chun blaiseadh a thabhairt dóibh ar an méad Gaeilge atá le cloisint sna cathracha agus chun an deis a thabhairt dóibh bualadh leo siúd atá ag obair in earnáil na Gaeilge. Cuireann na daltaí aithne orthu siúd atá mar chuid de mhórphobal na Gaeilge chomh maith. Tugtar cuairt ar an gCultúrlann i mBéal Feirste, ar Chonradh na Gaeilge agus ar Fhoras na Gaeilge i mBaile Átha Cliath agus ar na hionaid Ghaeilge eile atá le feiceáil sna príomhchathracha. Déan teagmháil linn inniu chun clárú don Turas Teanga.

 

 

Comórtas Thráth na gCeist

 

Eagraíonn Feachtas comórtas idir-scoileanna Thráth na gCeist fud fad na tíre gach bliain. Eagraítear craobhanna réigiúnda agus tagann na buaiteoirí go Baile Átha Cliath don chraobh deiridh le linn Mhí an Mhárta. Cuirfear tús le comórtas Thráth na gCeist i Mí Deireadh Fómhair. Má tá spéis ag do scoil foireann a chur isteach sa chomórtas i mbliana dean teágmháil linn go luath.

 

 

 

 

An Gael-Fachtóir—Seó Talainne Feachtas

Reachtáileann Feachtas an Gael-Fachtóir le linn Sheachtain na Gaeilge. Tugtar cuireadh do Ghaeilgeoirí óga ó fud fad na tíre páirt a ghlacadh sa chomórtas seo chun €300 a bhuachaint mar chéad duais.  Fáiltítear roimh aon ghníomh ar leith; amhránaíocht, damhsa, drámaíocht, cleasaíocht, srl. Bíonn an Gael-Fachtóir ar siúl i mBarra an Teampaill i mBaile Átha Cliath le linn Mhí an Mhárta.

Chun clárú don chomórtas seo nó chun tuilleadh eolais a fháil, déan teagmháil le hoifig Feachtas.

 

 

Má tá spéis agat nó ag do rang aon imeacht a eagrú trí mheán na Gaeilge, déan teagmháil linn agus cabhróidh muid libh. Ba bhreá linn do chuid smaoineamh féin a chloisteáil agus tacaíocht a thabhairt duit in úsáid shóisialta na Gaeilge a chur chun cinn.